सोलुखुम्बु । लिखुपिके गाउँपालिकाको न्यायिक समितिमा ५ वटा उजुरीहरू छलफलको माध्यमबाट मेलमिलाप गरिएको छ । 

आर्थिक बर्ष २०८०/८१ मा गाउँपालिकाको न्यायिक समितिमा ६ वटा उजुरी परेकोमा ५ वटा उजुरी मेलमिलाप गरिएको गाउँपालिकाका उपाध्यक्ष ङवाङ ल्हाक्पा शेर्पाले जानकारी दिनुभयो ।

गाउँपालिकामा परेका उजुरीहरूमा गाली बेइजति एक वटा, खाना लगाउन नदिएको एक वटा, जग्गा सिमाना विवादको दुई वटा, लेनदेनको एउटा र कुटपिटको उजुरी एक वटा रहेको उपाध्यक्ष शेर्पाले बताउनुभएको छ ।  

गाउँपालिकाको न्यायिक समितिमा परेका उजुरी मध्य जग्गा सिमाना विवादको एउटा उजुरी माथि छलफल हुन बाँकी रहेको उपाध्यक्ष शेर्पाले बताउनुभयो । 

न्यायिक क्षेत्र नितान्त कानुनी पाटो रहेको र न्यायिक समितिमा कानुन अध्ययन गरेका व्यत्तिहरु नरहेको कारण न्याय सम्पादनमा कठिनाइ हुने गरेको बताउनु भएको छ ।